Виновник за препознавање на стајлингот на Scirocco кај Polo е предната маска која го напушта досегашниот дизајн со огромна решетка во носот и оди кон нешто многу поeдноставно со само два хоризонтални отвори меѓу аглестите предни светла.

Визуелно ова е многу подобро. Чистиот дизајн не е карактеристичен само за маската, туку за целиот автомобил кој делува многу посериозно од сегашниот модел.

Новиот Polo ќе биде поставен на платформата со кодна ознака PQ25 врз која веќе лежи Seat Ibiza, што значи дека ќе биде незначително поголем, но сепак, ќе има повеќе простор во кабината.

Наследникот треба да биде квалитативно подобар од претходникот. Големо внимание е посветено на изборот на материјали во внатрешноста, но и на опременоста. Барем така велат во VW.

Под хаубата ќе работи веќе познатата моторна понуда на бензинци и дизели. Врвот од понудата е резервиран за 1.4 литарскиот TSI со 170 коњски сили кој ќе се вградува во Polo GTi, а најштедливиот Bluemotion ќе има емисија на СО₂ помала од 100 g/km и во просек ќе троши 3,8 литри.

Покрај вообичаената каросериска понуда со три и со пет врати новиот Polo ќе биде на располагање и како купе-кабрио и како малечок SUV за кого веќе пишувавме.